Plattdeutsche Nachrichten

De Plattdüütschen Narichten vun'n 20. November 2019

Plattdüütsch Narichten vun'n 20. November 2019, [3:49]

Lufthansa un Ufo köönt sik nich enig warrn

Berlin: Ut de grote Slichtung för de Lüüd, de bi Lufthansa in de Kabinen arbeidt, warrt dat nix. Op den letzten Momang hett de Lufthansa güstern Avend ehr „Ja“ trüchnahmen. Wat dor achter stickt: De Gewarkschaft Ufo harr nich kloor seggt, dat se keen Streik maakt bi een vun de veer Lufthansa-Ãœnner-Bedrieven. Wiedermaken wüllt se aver bi dat „lütte Slichten“. Dor geiht dat um enkelte Punkten as Utlagen un Extra-Geld. Bi Ufo wüllt se de Laag nu eerstmal mit de egen Lüüd besnacken.

Von Weizsäcker sien Söhn in Krankenhuus dootstaken

Berlin: In en Krankenhuus is güstern Avend de Söhn vun den fröheren Bunnspräsident von Weizsäcker dootstaken worrn. Fritz von Weizsäcker is de böverste Dokter vun de Klinik ween. He harr en Vördrag hollen, as en Mann mit en Metz op em daalgüng. Noch dor is von Weizsäcker sturven. Den Mann, de dat woll maakt hett, hett de Polizei mitnahmen.

Polizei söcht in Wahnungen vun Vereen „Phalanx 18“

Bremen: Vun hüüt Morgen op an stellt de Polizei en Reeg Wahnungen in Bremen un Neddersassen op den Kopp. Dat geiht gegen den Vereen „Phalanx 18“. De steiht op de rechte Kant un is verbaden. De Bremer Binnenbehöörd seggt: De Vereen steiht in för Gedanken, de ut den Nationalsozialismus kaamt un gegen de Verfaten sünd. Düsse Ansichten will he mit Macht dörsetten. So harr he sik insett för rechtsextremistische Musik un för Drapen, de verbaden weren. Anfang November harr „Phalanx 18“ en Konzert mit Rechtsextreme op de Been stellt. Binnensenater Mäurer harr dat aver nich tolaten.

Stadt will bi Land för Bedrieven in Hemeln mitsnacken

Bremen: Wenn dat um de Tokunft vun de Landstücken in Hemeln geiht, wo fröher Coca Cola un Könecke op weer, will Bremen mitspelen. De Stadtbörgerschap hett en Andrag vun SPD, Gröne un Linke annahmen. Dor steiht binnen: De Stadt hett en Vörrecht, dat Land to kopen. Ok sett se dor en P vör, dat wat ännert warrt. Dat Coca-Cola-Land hett al de Immobilienkonzern Wohninvest köfft. En Mann vun dat Unnernehmen sä: Se wüllt dat mit de Stadt tohoop planen. Enn November will sik Bo-Senatersch Schaefer vun de Grönen dat eerste Mal mit den Geldgever an een Disch setten.

Börgerpark-Tombola: So veel innahmen as noch nie

Bremen: Bi de Börgerpark-Tombola blifft düt Johr so veel ünner’n Streek as noch nie. Bi’t Lose-Verköpen hebbt se in’t Vörjohr en Plus vun 420.000 Euro inspeelt. Dat sünd teihn Perzent mehr as 2018. Solang as dat den Euro geven deit, hebbt se so veel noch nich insammelt. Dat weer to hören, as se den symbolischen Scheck in’t Raathuus övergeven hebbt.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Syke 0 Graad, in Bremen is dat 1 Graad un op Langeoog sünd dat 4 Graad. Vundaag: Vele Wulken, gries un dakig. Af un an pladdert dat en beten, meisttiets aver blifft dat dröög. De Sünn waagt sik blots ganz kort mal rut. Dat Thermometer krabbelt op 3 bet 5 Graad. De Wind dorto weiht flau vun de oosten bet süüdoosten Kant. Tokamen Nacht: Jümmers noch dichte Wulken, ok Daak kann sik utbillen. Dat drüppelt blots en ganz beten. Bi 3 bet 0 Graad. Schullen sik de Steerns doch mal wat länger wiesen, mööt wi ok mit Frost reken. Morgen: Wulken över Wulken, düüster-dakig. Ok Spütterregen kann daalkamen. Vun’t Emsland bet hen na de Oostfreeschen Inseln kann dat ok mal oplockern. Dat Ganze bi 5 bet 7 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.