Plattdeutsche Nachrichten

De Plattdüütschen Narichten vun'n 11. November 2019

Plattdüütsch Narichten vun'n 11. November 2019, [3:28]

Demonstrant in Hongkong anschaten

Hongkong: Bi nee’e Proteste in Hongkong is en Demonstrant swor versehrt worrn. Tovör hett de Polizei woll versöcht, en blockeerte Straat free to maken. Dorbi hett en Polizist en Demonstrant, de sik wat vör’t Gesicht bunnen harr, in de Bost schaten. Sekunnen later hett he noch tweemol schaten, un en wieterer Demonstrant güng to Bodden. Siet Maanden gifft dat in Hongkong jümmers mol wedder massenhafte Proteste för mehr Demokratie un gegen den wassenden Influss vun Fastland-China.

Sozialistische Arbeiderpartei winnt Parlaments-Neewahl

Madrid: De sozialistische Arbeiderpartei vun Ministerpräsident Pedro Sánchez hett de Parlaments-Neewahl in Spanien heel düütlich wunnen. As betto utrekent worrn is, hebbt de Sozialisten aver mit meist 28 Perzent vun de Stimmen de afslute Mehrheit mol wedder nich schafft. Spanien drauht dormit wieterhen en politische Blockaad. De konservative Volkspartei PP blifft mit meist 21 Perzent de tweetstärkste Frakschoon.

Boliviens Präsident will trüchtreden

La Paz: Boliviens Präsident Evo Morales hett ankünnigt, dat he sien Hoot nimmt. Dormit reageert he op de massenhaften Proteste. Bavento hett he vun de Polizei un de Armee keen Stöhn mehr kriggt. Mit de Präsidentschaftswahl vun‘n 20. Oktober weern veele nich inverstahn. De Oppositschoon hett se nich gellen laten, wiel se vun Wahlbedregeree utgeiht. Bi Proteste na düsse Wahl sünd dree Minschen doodbleven un mehr as 300 versehrt worrn.

Linke wüllt Verkoop vun Hulsberg-Viddel stoppen

Bremen: De Linken wüllt den Verkoop vun Gründstücken bi dat nee’e Hulsberg-Viddel vörerst stoppen. Mit dat Geld, dat dorbi rutsprungen weer, harr de Klinikneebo op dat Flach betahlt warrn schüllt. De Linken wüllt de Grundstücke nu eerstmol blots verpachten. Dormit wüllt se hoge Priesen för de Grundstücke un düere Mieten afwennen. Dat hebbt de Linken op ehren Landsparteidag beslaten. En wieterer Punkt op’t Tapeet weer de Schuldenbrems. De wüllt de Linken opweken, üm Geld in Scholen un Kitas rinsteken to könen.  

Autobränn in’t Bremer Viddel

Bremen: In’t Viddel hebbt in de Nacht twee Autos brennt. Een dorvun hett böös wat afkregen, dat annere licht. De Polizei hett een fastnahmen, vun den se denkt, he kunn dat maakt hebben. He ward opstünns utfraagt. Of dat mit annere Autobränn in de verleden Tiet tosammenhangt, is in Momang noch nich kloor.   

Dat Weer

Un nu en Blick op dat Weer: an’n Bremer Flegerhaben 1, in Demorst un Emden 2, un in Bremerhaben un Wilhelmshaben sünd dat opstünns 3 Graad. Hüüt schient an’n Vörmiddag meisttiets noch de Sünn. Later warrn de Wulken vun’t Emsland her dichter, un an’n Avend gifft dat twüschen Ems un Werser Regen. De Temperaturen liggen twüschen 6 un 8 Graad. In de Nacht is dat mol mehr, mol weniger wulkig. Later kann dat westen de Werser hier un dor schuern bi 5 bet 4 Graad. Morgen is dat mol mehr, mol weniger wulkig. Besünners an’n Namiddag kann dat jümmers mol wedder oplockern, so dat sik de Sünn wiesen kann. Över Dag gifft dat aver ok mol lichte Schuer bi 6 bet 7 Graad.

Dat weern de Narichten op platt. Tohoopstellt hett se Carola Schwirblat. Op Platt trechtmaakt un vörleest vun Marc Gelhart.