Plattdeutsche Nachrichten

De Plattdüütschen Narichten vun'n 9. Mai 2019

Plattdüütsch Narichten vun'n 9. Mai 2019, [3:34]

Nich een Kandidat för dat Amt vun´t Börgermeister liggt dütlich vörn

Bremen: Tweeeenhalf Weeken för de Börgerschaftswahl in Bremen hett keen vun de beiden Topkandidaaten, vun SPD un CDU, de Näs vörn. Dat hett een Ãœmfraag vun Infratest-Dimap, in´t Opdrag vun Radio Bremen, rutfunnen. CDU-Topkandidat Meyer-Heder kummt dorna op 31 Perzent. Börgermeister Sieling vun de SPD kummt op 39 Perzent. De Weert is so deep as noch nienich vörher. In de Feernsehsendung „Buten un Binnen Wahllokal“ harr Sieling to dat, wat dorbi rutsuert is seggt, dat dat nu eene grote Opgaav för em is.

Bundesdag besnackt sik över Inwannerung för Fachlüüd

Berlin: De Bundesdag besnackt sik, siet hütt Vomdag dat eerste Mal, över dat Fachlüüd-Inwannerergesetz, wo dat mehrere Menen to gifft. Dat Gesetz seggt, dat Lüüd ut Nicht-EU-Staaten in Düütschland arbeiden dröfft, wenn se eenen Arbeitsverdrag hebbt un dorför utbillet sünd. De so nömte „Vorrangsprüfung“ schall wegfallen. Mit de harr man eerst prüft, wat nich eene düütsche Kraft för den Job to kriegen is.

USA hett nee`e Straafen gegen den Iran utsproken

Washington: De USA hett scharpere Straafen gegen den Iran utsproken. Na US-Präsident Trump schall dat to allereerst de Metallbranche in´t Land drepen. De Industriemetalle sind in den Iran, na dat Erdöl, dat wichtigste Gut , wat se utföhrt. Gistern harr de Regerung in Teheran kund dahn, dat se Deele vun´t internationalet Atom-Afkamen utsetten willt. Nadem de USA ut den Verdrag rutgahn is, willt se, vun ehre Siet ut, ok nich mehr doran fasthollen.

Staats-un Regerungsböverste willt den tokünftigen EU-Kurs op den Weg bringen

Sibiu: De europäischen Staats-un Regerungsböversten willt sik hütt Middag över dat EU-Programm för Arbeit, för de tokamen Johren, besnacken. Dat geiht ok um de Opgaaven: Migration, Digitalisierung, Politik vun de Wirtschaft, bit hen to den Schutz för de Ümwelt. Ok willt se Weerte to Protokoll geven, so as Demokratie, Rechtsstaatlichkeit un dat jedeen dat kricht, wat een verdeent. De britische Premierministersch May is bi den EU-Gipfel in Rumänien nich dorbi.

Bremer Senat schall sik för Verbeden vun Werbung för Tabak insetten

Bremen: De Bremer Landesregerung schall sik bundeswiet för een Verbeden vun Werbung för Tabak insetten. Dat hett de Börgerschaft mit de Stimmen ut alle Fraktionen, mit Utnahme vun de FDP, besloten. As Grund dorför is angeven, dat de Werbung für Glimmstengel dat sworer maakt junge Lüüd vun´t Smöken aftohollen. Düütschland is dat eenzige Land in de EU, wo man för Tabak noch op grote Plakatwännen or in´t Kino Werbung maken draff.

Dat Weer

Un nu een Blick op dat Weer: in Cuxhaben, an den Bremer Flegerhaben un an de Fischreehabenslüüs in Bremerhaben 12 un in Ossenbrügg sünd dat opstunns 13 Graad. Hüüt wesseln sik de Sünn un de opstiegenden Wulken af. Dat kann hütt Vomdag Schuers geven, de hütt Nomdag duller ward. Hier un dor ok mit Blitz un Dunnerslag, bi 15 bit 18 Graad. Tokamen Nacht wiest sik de Heven wulkig, dat kann ok af un an mal pieseln. Dat Thermometer sackt op 7 bit 9 Graad. Morrn wesselt sik de Sünn un de Wulken wedder af. Man dor kummt nich mehr se veel Natt vun baben runner as hütt. An de Küst is dat meist för längere Tied fündlich, bi 11 bit 14 Graad. Ok Sünnavend blifft dat jüst so wesselhaft, mit eenen Mix ut Sünn, Wulken un Regen, bi milden 6 bit 8 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Antje Kruppa.