Plattdeutsche Nachrichten

De Plattdüütschen Narichten vun'n 8. Mai 2019

Plattdüütsch Narichten vun'n 8. Mai 2019, [3:40]

Bremers troot de SPD jümmers weniger to

Bremen: De Minschen in Bremen troot de SPD jümmers weniger to. Dat seggt en Ümfraag vun Infratest Dimap, de Radio Bremen in Opdrag geven harr. Blots 24 Perzent vun de, de se fraagt hebbt, meent: de Sozialdemokraten köönt de gröttsten Opgaven in Bremen lösen. Kott vör de Börgerschapswahl 2015 weren dat noch 38 Perzent. De CDU troot de Lüüd dorgegen nu mehr to: Vör de letzte Wahl weren dat 24 Perzent, nu sünd dat 30.

Feernsehduell vun de Top-Kandidaten bi de Europawahl

Brüssel: Wenn dat na den Top-Kandidat vun de Sozialdemokraten bi de Europawahl, Timmermanns, geiht, schall överall in Europa en CO2-Stüer kamen. In dat eerste Feernseh-Duell mit sien Wedderpart vun de konservative EVP, Weber, hett he verlangt: Dat Thema mutt ganz baven stahn. Weber will keen CO2-Stüer. Dat güng to Lasten vun de, de nix in de Melk to krömen hebbt. Enig weren sik Timmermanns un Weber dorin, dat Benzin för Fleger nich länger stüerfree ween schall.

Iran will ut Atom-Verdrag rut

Teheran: Dat lett: De Iran will nich mehr an all Punkten vun den Atom-Verdrag fasthollen. Medien hebbt to weten kregen: Präsident Ruhani hett de Böversten vun de Staaten un Regerungen in Düütschland, China, Frankriek, Grootbritannien un Russland dat bekannt maakt. Den Atom-Verdrag hebbt se 2015 in Wien ünnerschreven. Dor steiht binnen: De Iran faat sien Atomprogramm nich mehr an, dorför nehmt de annern Staaten de Strafen gegen dat Land trüch.

Berlin: Kabinett will Wahngeld hoochsetten

Berlin: Dat Kabinett will hüüt Vörmiddag besluten: Dat Wahngeld warrt hoochsett. Um un bi 660.000 Huushollen schüllt tokamen Johr dor goot vun hebben. Dat Wahngeld bringt Stütt to’n Bispeel bi dat Hüergeld för so’n Lüüd, de anners en Andrag op Hartz IV stellen müssen. Dat is dree Johr her, dat se dat Wahngeld dat letzte Mal ropsett hebbt. Wo dat Hüergeld so veel dürer warrt, will de Regerung dat nu faken mal naregeln.

Börgerschap will ja seggen to School-Övereenkunft

Bremen: De Börgerschap snackt an’n Middag över de Bremer Bildungs-Övereenkunft. De Top-Lüüd vun de SPD, CDU, Grönen un Linken harrn sik dor verleden Harvst op enigt. Nu schall dat Parlament dat Poppier annehmen. Dor steiht binnen: In Bremen gellt de beiden Pieler Gymnasium un Oberschool. Ok wüllt se en Institut grünnen – dat schall sik ankieken, wo goot de Ãœnnerricht is un woans se em beter maken köönt.

Dat Weer

Un woans süht dat mit dat Weer umto ut? Opstunns hebbt wi in Bremen un op Wangeroog 9 Graad, in Brevöör sünd dat 10 un in Bremerhaven 11 Graad. Vundaag: De Wulken ballt sik mehr un mehr tohoop, un an’n Namiddag treckt vun’t Emsland her gau Regen ran. Dat Thermometer krabbelt op 12 bet 15 Graad. De Wind dorto weiht in Maten vun de süüdoosten Kant, mag ween ok frisch un mit deegte Böen. Tokamen Nacht: De Regenwulken treckt över de Elv af, achteran funkelt ok de Steerns un dat is dröög. Bi 9 bet 7 Graad. Morgen: Eerst: Mal mehr, mal weniger Wulken, de ballt sik denn aver tohoop. Dat regent, mag ween ok mit Blitz un Dunnerslag. Bi 15 bet 17 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.