Plattdeutsche Nachrichten

De Plattdüütschen Narichten vun'n 2. April 2019

Plattdüütsch Narichten vun'n 02. April 2019, [3:05]

Ünnerhuus: Keen Ja för Brexit-Vörslääg

London: Dat britsche Parlament hett noch wedder anner Vörslääg aflehnt, ut de EU ruttokamen. De meisten Ja-Stimmen hett güstern Avend noch de Andrag kregen, dat Grootbritannien in en Toll-Union mit de EU blifft. De Brexit-Beopdragte vun dat EU-Parlament, Verhofstadt, meen: Nu löppt allens teemlich kloor op en harten Brexit to.

Behörden stellt fast: Weniger Angriffen gegen Islam

Berlin: In Düütschland hett dat nich mehr so vele Angriffen gegen den Islam geven. Verleden Johr sünd Muslime 813 mal angrepen worrn. So steiht dat in de „Nee’e Ossenbrügger Zeitung“, un de hett de Tallen ut dat Binnenministerium. 2017 harrn se noch 950 Attacken tellt.

Top-Kandidaten snackt hen un her

Bremen: De beiden Top-Kandidaten vun de SPD un de CDU, Sieling un Meyer-Heder, hebbt sik güstern Avend dat twete Mal vör de Börgerschapswahl to en Hen- un Her-Snack-Runn drapen. Sieling hett rutstellt, wo goot de Weertschap wassen deit. Man Meyer-Heder hett bekriddelt: Bi Projekten as de Kaje för Buten-op-See-Wind-Anlagen geiht nix na vörn. Vun de Saak her weer he aver för den OTB – anners as sien Frakschoon, de gegen düssen Plaan is.

Mehr un mehr Radfohrers starvt op düütsche Straten

Wiesbaden: Verleden Johr sünd kloor mehr Radfohrers to Dode kamen. Dat Statistische Bunnsamt hett tellt: Op düütsche Straten sünd 455 Minschen storven. Dat sünd 15 Perzent mehr as 2017. Bi E-Bikes weren dat sogoor knapp 30 Perzent mehr.

BGH över Pleegfäll an’t Leven hollen

Karlsruh: De Bunnsgerichtshoff gifft vundaag sien Ordeel af över de Fraag, woveel daan warrn mutt, um Minschen an’t Leven to hollen. Klaagt harr en Mann; sien dementen Vadder harrn se över Johren künstlich to Eten un to Drinken geven. De Söhn verlangt vun den Dokter Bröök un Geld för den Schaden.

Dat Weer

Un woans süht dat mit dat Weer umto ut? Opstunns hebbt wi in Bremen un Bremerhaven 6 Graad, op Langeoog sünd dat 7 un in Ossenbrügge 9 Graad. Vundaag: Eerst noch veel Sünnschien, denn aver treckt vun’t Ollenborger Land mehr un mehr dichte Wulken op, un de köönt an’n Namiddag un Avend den een oder annern Schuer op uns daalsmieten, mag ween ok mit Blitz un Dunnerslag. Dat Thermometer krabbelt op 15 bet 18 Graad. De Wind dorto weiht in Maten vun de süüdoosten bet süden Kant, wo dat schuert, ok mit starke bet störmsche Böen. Tokamen Nacht: Mal mehr, mal weniger Wulken, un de bringt ok Schuer mit, toeerst ok noch Gewidder. Na Middernacht warrt dat wat dröger. Dat Ganze bi 8 bet 7 Graad. Morgen: Eerst hebbt noch de Wulken de Bavenhand. De Sünn pliert dor blots af un an mal rut. Dat kann ok en beten pladdern, vör allen na dat natte Dree-Eck un dat Ole Land to. Bi 10 bet 11 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Jan Siegert.