Plattdeutsche Nachrichten

De Plattdüütschen Narichten vun'n 6. Dezember 2018

Plattdüütsch Narichten vun'n 6. Dezember 2018, [3:13]

Polizei-Akschoon in Bremen

Bremen: De Bunnspolizei is mit 400 Schandarms gegen de organiseerte Kriminalität angahn. Vör allen güng dat üm dat Klauen vun düre Auto-Delen op den Bremer Güter-Bahnhoff. Dree Lüüd hebbt se fastsett. En Reeg Hüüs hebbt se op’n Kopp stellt. Hüüt Namiddag wöllt de Bunnspolizei un de Staatsanwalt enktelte Punkten bekannt maken.

Altmaier is för Kramp-Karrenbauer as CDU-Baas

Berlin: Wo de CDU en neen Vörsitter wählen will, hett nu Wirtschaftsminister Altmaier sien Verscheel dorto geven. He is för de Generalsekretärsche Kramp-Karrenbauer. Vörher harr sik Bunnsdagspräsident Schäuble för Friedrich Merz insett. Dat harr em wunnert, sä Altmaier, ut Respekt harr he egentlich nix dorto seggen wullt.

Macron geiht op de Geelwesten to

Paris: Vele sünd bang, dat kunn wedder Oprohr geven, man nu is de franzöösche Regerung een Stapp op de Geelwesten togahn. Präsident Macron hett fastleggt: De Stüern op Benzin un Diesel warrt dat ganze Johr 2019 nich hoochsett. Vörher schull dat blots för söss Maand gellen. De högeren Stüern harrn vele Franzosen op de Straten dreven, verleden Wekenenn harr dat Krawall un Randale geven.

Bunnslänner: Keen Digitalpakt

Berlin: Fief Milliarden Euro will de Bund an de Länner geven. Dat schall de Digitaliserung in de Scholen op de Been helpen. Dorför mööt se dat Grundgesetz ännern. Dor aver hebbt de Bunnslänner en P vör sett. Se sünd bang: So kunn jüm dat Bildungssystem in’t Land ut de Hand nahmen warrn.

So veel CO2 as noch nie?

Kattowitz: Kunn ween un op de ganze Welt warrt düt Johr so veel Kohlendioxid in de Luft blaast as överhaupt noch nich. Dat hebbt Wetenschaftlers op de UN-Klimakunferenz vörrekent. De Forschungsverband „Global Carbon Project“ meent: Gegen verleden Johr warrt dat 2 Perzent mehr düt Johr an Drievhuusgas.

Dat Weer

Un woans süht dat mit dat Weer umto ut? Opstunns hebbt wi in Osterholt 6 Graad, in Bremen un Bremerhaven sünd dat 7 un in Emm 8 Graad. Vundaag: Wulken över Wulken, den Heven kriegt wi meist gor nich to sehn. Hier un dor kann dat ok mal en beten pladdern oder pieseln. Dat Thermometer krabbelt op 10 bet 11 Graad. De Wind dorto weiht flau oder en beten mehr vun de süüdwesten Kant, an’n Namiddag an de Küst ok mit deegte Böen. Tokamen Nacht: Jümmers noch dichte Wulken. Un pladdern kann dat ok. Dat Ganze bi 9 bet 10 Graad. Morgen: Överall, wo Bremen een to hören is, regent dat meist egaalweg. Un dor kummt ok en ganzen Barg dal. Also: Nich den Regenscheerm vergeten. Dorför warrt dat noch wat warmer mit 11 bet 12 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katharina Kuntze.