Plattdeutsche Nachrichten

De Plattdüütschen Nahrichten vun'n 16. Mai 2012

Plattdüütsch Nahrichten vun'n 16. Mai 2012, [2:56]

Hollande bi Merkel

Berlin – De neje Präsident vun Frankriek, Hollande, weer bi sien erste Reis in't Utland an'n Abend to Gast in Dütschland. Bunneskanzlersche Merkel hett em mit militärischen Ehren in't Berliner Kanzleramt begrööt. Beide säen achternah, se wullen dat dat jümmer beter ward mit de Fründschupp twüschen Dütschland un Frankriek. Se snacken ok över de Eurokrise un wat dar in Greekenland jüst so passeert. Hollande as ok Merkel wüllt to den europäisch Fiskalpakt Programme bistüern, de de Wertschupp anschuuvt. Merkel lehnt togliek af, dat an'n Fiskalpakt wat afknappst ward.

Greeken hollt ehr Geld vun de Bank

Athen – De unsekere politische Laag in Greekenland hett de Börger woll in Unroh bröcht. To'n Anfang vun de Week sünd 700 Millionen Euro vun de Banken afhaben worrn. Staatsbankbaas Provopoulos vermellt, de Laag wees swaar un dat Bankensystem bannig swack. Dat de Lüüd bang sünd, kunn ok in Panik ümslaan. Güstern weern de Versöök, een Regeern to billen, een för allemal fehlslaan. In'n Juni schall dat Neewahlen geven.

Kriminalstatistik ward vörstellt

Berlin – Bunnesbinnenminister Friedrich stellt hüüt de Kriminalstatistik för dat Jahr 2011 vör. As Medien vermellt, steiht in de Statistik för dat verleden Jahr ünner annern mehr Fälle vun Kinnesmissbruuk un Besorgen vun Kinnerpornografie. Ok de Verbreken rund üm Drüselgifte, de se mitkreegen hebbt, de hebbt ok tonahmen.

Neje Kieme in Bremen, de se nich bikamen köönt

Bremen – In't Krankenhuus Midde sünd wedder Kieme an een Lüttkind funnen worrn, de se nich bikamen köönt. Dat Kind is vör 10 Weeken as Lüürlüttkind in't Krankenhuus Links der Weser boorn worrn. Dat schient, dat dat Kind erst in't Krankenhuus Midde mit den Kiem tohoopkamen is. Of sik dat üm den glieken Stamm hannelt, an den in de verleden Tied dree Kinner sturven sünd, is noch nich klaar.

Bunnesfreewilligendeenst ward in Bremen slecht annahmen

Bremen – De Bunnesfreewilligendeenst ward in Bremen meist nich annahmen. In'n Vergliek mit 50 Städten liggt Bremen op den vörlesten Platz. Pro 100-dusend Inwahner hebbt sik nich mal 22 Bremer för den freewilligen Deenst beworben. In Hamborg or Hannober sünd dat veel mehr.

Dat Weer

Un nu een Blick op dat Weer: an den Bremer Fleegerhaben, an de Fischereehabenslüüs in Bremerhaben un in Ollenborg 9 un op Wangerooge sünd dat opstunns 8 Grad. Hüüt is dat meist dick wulkig, Schuer sünd mögelk, af un an is Grisselgrussel mit darbi as ok Grummelschuers. To'n Nahmiddag hen köönt de Wulken oplockern un dat schuert nich mehr so faken bi 10 bit 12 Grad. Tokamen Nacht ward de Heben denn lichter wulkig or klaar un meist dröög, dat Thermometer sackt op 6 Grad. Morrn erst veel Sünnschien, denn later jümmer mehr Wulken un ok Schuers bi 12 bit 14 Grad. An'n Freedag: blangen Wulken kiekt ok mal de Sünn, dat blifft meist dröög un ward een beten warmer bi 15 bit 17 Grad. Dat weern de Nahrichten op platt. Ulrike Müller hett se tohoopstellt. Op platt trechtmaakt un vörleest hett se Heidi Jürgens.